Pinahewas pa kan Department of Social Welfare and Development (DSWD) an sakop kan saindang operasyon sa pagheras kan family food packs komo pagsimbag sa pangangaipuhan kan mga pamilyang labi na naapektaan kan magkakasunod na mga bagyong nanlamasa sa nasyon kasuarin sana.
Obheto kan lakdang na ini na masierto na an kinakaipuhang tabang an makakaabot sa lambang pamilyang naapektaran kan kalamidad.
Sigun sa pinakahuring datos na iniluwas kan DSWD, nag-abot na sa kabilogang 249,477 kahon kan family food packs (FFPs) an saindang naiheras sa mga pamilyang direktang naapektaran kan mga bagyo.
Sa laog kan kabilogang numero na ini, labi sa 64,000 food packs na an naiheras asin naihatod sa Bicol region, saro sa mga rehiyong labi na nalamasa kan mga bagyo.
Mientrastanto, labi sa 30,000 na man an nakaabot sa Cagayan Valley asin Western Visayas, mga lugar na naghahampang man sa matinding huma huli sa mga pag-uran asin pagbaha.
Dae man nag-uuntok an ahensiya sa pagreplenish kan saindang mga warehouse tanganing masierto an bastante na supply kan food packs.
Kasabay kaini, puspusan man an pagpano kan mga truck na iyong mahatod nin mga tabang pasiring sa mga apektadong lokal na gobyerno.
Sa kabilogan, nagpakol na sa labi ₱176 milyong kantidad kan humanitarian assistance an naihatod kan DSWD sa mga rehiyong apektado kan mahewasang pag-uran asin pagbaha.
Padagos man na nakatutok an ahensiya sa kapakanan kan pigkakarkulong nasa 32,000 pamilyang nagtitinir sa manlaen-laen na evacuation centers.
