Kumpiyansa an House Prosecution Team na magigin maayos, patas, asin nakaayon sa Konstitusyon an pagdalagan kan impeachment trial kontra kay Vice President Sara Duterte. Segun sa grupo, dakulang papel an magigin testimonya kan mga opisyal kan Commission on Audit (COA) sa paghatag kan mga dokumento asin ebidensyang may koneksyon sa mga alegasyong pigkakahampang kan Bise Presidente.
Sa intrevista kan Bombo Radyo Naga kay Rep. Terry Ridon kan Bicol Saro Party-list na preparado an House Prosecution sa pagpresentar kan saindang mga ebidensya asin mga testigo. Aniya, an testimonya kan mga opisyal kan COA importanteng parte kan pagberipika sa mga transaksyon asin paggamit kan public funds na kaibanan sa mga isyung pigbubutasan sa impeachment complaint.
Segun pa ki Ridon, an impeachment iyo an konstitusyonal na mekanismo tanganing mapanimbag an mga halangkaw na opisyal kan gobyerno kun igwa nin seryosong alegasyon kontra sainda. An proseso suboot an dapat magin patas sa gabos na lado asin ibase sa mga ebidensya asin sa balaod.
Idinagdag man ni Ridon na responsibilidad kan House Prosecution na ipresentar an mga ebidensyang makakapagpatibay sa mga artikulo kan impeachment. Nagpahayag man nin kumpiyansa na an Senado, bilang impeachment court, maghihimo nin desisyon na nakabase sa mga ebidensya asin testimonya na ipipresentar sa pagdangog.
Mientras tanto padagos an pagpreparar kan mag-ibong na lado para sa masunod na mga sesyon kan impeachment trial. Mantang nagpapadagos an proseso, padagos man an pag-abang kan publiko sa mga susunod na pagdangog, lalo na sa pagtestigo kan mga opisyal kan COA asin iba pang mga testigong pinaglalaoman na makakapagtao nin importanteng impormasyon sa kaso.
