Binawi kan defense team ni dating Presidente Rodrigo Duterte an saindang kahagadan sa Appeals Chamber kan International Criminal Court (ICC) na madiskuwalipika si Prosecutor Karim Khan gikan sa pagkapot kan kaso kontra sa dating Presidente.
Sigun pa sa lead counsel ni Duterte na si Atty. Nicholas Kaufman sa dokumentong igwang petsang Agosto 15, mayo nang rason tanganing pagdudahan an pagigin patas ni Khan o an saiyang pahayag na mayo ining conflict of interest katakod kan dating kliyente na inakusarang biktima kan war on drugs.
Dugang pa ni Kaufman, habo kan kampo ni Duterte na ulangan an marhay na bulos kan proseso sa paagi kan padagos na pagtutol sa pagpartisipar ni Khan.
Naenot nang sinabi ni Kaufman na dapat halion si Khan huli ta dati soboot ining abogado kan mga biktima kan war on drugs.
Alagad hurot ni Khan na mayo ining conflict of interest asin dae kaipuhan na mag-atras sa kaso.
Pig-omaw man ni Kaufman an Prosecutor sa pagigin bukas asin maagap sa pagtataong-impormasyon makalihis ining maitalaga komo counsel ni dating Presidente Duterte.
