Nagpapadagos an ginigibong lifestyle checks kan Bureau of Internal Revenue (BIR) sa mga opisyales kan gobyerno.
Ikinasar kan BIR an lifestyle check makalihis ipagsugo ni Presidente Ferdinand Marcos Jr. an pag-audit komo simbag sa soboot anomalya sa flood control spending.
Kinumpirmar ni Presidential Communications Office (PCO) Undersecretary asin Palace Press Officer Claire Castro na pinuonan nang isagibo kan BIR an direktiba kan Presidente.
Pinagsugo na sa BIR asin ngynyan an maikokonsiderar na ongoing an ginagibong nasambitan ng lifestyle check, sigun pa ki Castro.
Dae naman makapagtao si Castro nin timeline kun nuarin ipaluluwas an initial findings.
Maruumdumang kan nakalihis na bulan nin Agosto, ipinagsugo ni Presidente Ferdinand Marcos Jr. an lifestyle check sa gabos nin opisyales kan gobyerno sa tahaw kan kontrobersiya sa flood control projects sa manlaen-laeng parte kan nasyon.
Ipinagsugo man kan Presidente an dagos-dagos na pagsusuri sa mga rekord kan Department of Public Works and Highways (DPWH) katakod kan mga maanomalyang proyekto kan ahensya.
Dagos-dagos an imbestigasyon tangani matukoy an mga nasa likod kan mga proyektong dapat kuta an makakatabang sa solusyon sa mahewasang pagbaha sa nasyon.
Mientrastanto, labi sa 19,000 na an entry o naresiber na reklamo sa Sumbong sa Pangulo website.
Dae masabi ni Castro kun pirang opisyales an presenteng nasa irarom kan financial scrutiny o kun an mga kontratista an kabali sa audit.
