NAGA CITY- Naninindogan an Land Transportation Franchising and Regulatory Board (LTFRB) na dae na papahewason pa an provisional authority to operate kan unconsolidated jeepneys.
Enot na kayang ipigprosopwesto ini kan sarong lehislador kan Mayo sa pagmamawot na mas mahiling asin maintindihan an mga benepisyo kan consolidation na kaipohan sa irarom kan public transport modernization program.
Inisyal na man na sinaysay ni LTFRB Chairperson Teofilo Guadiz na pag-aadalan kan saindang ahensiya an nasambitan ng prosopwesto. Alagad makalihis an pagtiripon kaibanan an mga opisyal kan Department of Transportation kan Lunes, sinaysay ni Guadiz na dae na mapag-aadalan sa ngunyan an prosopwesto nin huli ta mawot na kan Marcos administration na ipadagos an modernization program.
Sinaysay man kan LTFRB chief na an guidelines para sa pagdakop kan mga dae nag-consolidate na jeepneys an presenteng nakabinbin pa mantang pighahalat an approval kan DOTr.
