Pigsuspendir kan Land Transportation Franchising and Regulatory Board (LTFRB) an prangkisa kan sarong bus na imbwelto sa nangyaring aksidente sa Ragay, Camarines Sur na ikinagadan nin nagkapirang pasahero.
Sa intrevista kan Bombo Radyo Naga ki Joel Defeo, Regional Director, LTFRB Bicol, sinaysay kaini na nagpaluwas sinda nin show cause order an operator na mag-atubang sa sarong hearing sa maabot na Abril 22 tanganing magpaliwanag. An yunit na imbwelto sana an sinuspinde, bako an bilog na kompanya.
Padagos man an koordinasyon sa iba pang ahensya kan gobyerno, kabale na an Department of Public Works and Highways (DPWH), ngani na maaraman kun nakakontribwir sa nangyaring aksidente an kondisyon kan tinampo o road barriers.
Nakikipagkoordinar man an ahensya sa insurance company para sa tulos na tabang pinansyal sa mga biktima, kabale na an sagkod sa ₱400,000 para sa kada nagadan. Sa ngunyan, nagpapadagos pa an imbestigasyon ngani na maaraman kun responsable an operator o driver sa insidente.
