Mahigit 20 barko ang nakatawid sa Strait of Hormuz noong Sabado, ang pinakamataas na bilang mula Marso 1, ayon sa data ng shipping analytics firm na Kpler.
Ayon sa datos, kabilang sa mga barkong nakatawid ang lima na dating kargado ng produkto mula sa Iran, kabilang ang langis at metal, habang tatlo ang liquefied petroleum gas (LPG) carriers na may destinasyong China at India.
Isang Panama-flagged tanker na Crave, na may kargang LPG mula sa United Arab Emirates (UAE), ay patungong Indonesia.
Dalawang tanker naman na Akti A at Athina, na may refined products mula Bahrain, ay patungo sa Mozambique at Thailand.
Ang Liberian-flagged tanker na Navig8 Macallister ay nagdadala ng humigit-kumulang 500,000 barrels ng UAE naphtha patungong Ulsan, South Korea.
Isa pang malaking tanker, ang Fpmc C Lord, ay may kargang humigit-kumulang 2 milyong barrels ng Saudi crude oil at patungo sa Mailiao port sa Taiwan.
Ang Indian-flagged Desh Garima naman ay may dalang 780,000 barrels ng UAE Das crude oil patungong Sri Lanka, habang ang barkong Ruby ay may kargang fertilizer mula Qatar patungong UAE.
Samantala, ang tanker na Merry M ay may dalang petroleum coke mula Saudi Arabia na patungo sa Ravenna, Italy.
Ang pagdami ng mga barkong dumadaan sa Strait of Hormuz ay nangyari sa gitna ng patuloy na tensyon sa rehiyon, kung saan nananatiling mahalagang ruta ang nasabing daanan para sa pandaigdigang suplay ng langis at enerhiya.
