Posibleng ikulong sa Palawan o sa Davao Prison and Penal Farm an convicted on death row na si Mary Jane Veloso enkaso nakabalik na liwat sa Pilipinas sa Disyembre ngonian na taon.
Segun ki Bureau of Corrections Director General Gregorio Catapang Jr., pinag-iisipan na ninda kun saen matinir si Veloso pag-abot kaini sa nasyon.
Tolong jail hale sa Metro Manila, Davao asin Palawan an pigpipili ngonian kan ahensya.
Si Veloso pwedeng magtinir sa minimum security compound kan Correctional Institute for Women (CIW) kaiba an 20 iba pang Persons Deprived of Liberty (PDL).
Papapilion man suboot ninda si Veloso kun arin sa mga correctional facilities an mawot kaini. Si Veloso makakaresiber man nin training gikan sa Technical Education and Skills Development Authority (TESDA) tanganing makapagtrabaho ini sa mga plantasyon o depende sa mga skills na saiyang nanudan.
Mientrastanto, sa pag-abot ni Veloso gikan sa Indonesia, piglalaoman na matinir ini nin labi sa 2 o hasta sa 4 na semana sa diagnostics center ngani na magsairarom sa full body examination ngani na maaraman kun igwa ining sintomas o anuman na medical problems.
