NAGA CITY- Hahanapan soboot nin pwesto kan LGU-Naga an mga ambulant vendors kan siyudad.
Sa nagin paghampang sa mga kagawad kan media ni Naga City Mayor Leni Robredo, sinaysay kaini na igwang nagkapirang option an piglatag kan magkakanigong opisina dapit digde.
Kaibahan sa option an pagbugtak nin garo night market style sa tapat kan Public Market sa may parte kan General Luna tanganing yaon sana sa sarong area an mga nasambitan ng ambulant vendors para sa CBD 1.
Sigun ki Robredo, kaipuhan na pakarhayon an pwesto kan mga nasambitan ng paratienda tanganing magin marhay man an saindang paghahanapbuhay.
Kaipuhan na mapakarhay an saindang itsura, pagsierto kan sanitation orog na sa mga pagkakan an pigpapabakal tanganing dae magkaproblema sa salud o magkawsa nin pagkuriyat kan basura sa lugar na saindang kinamumugtakan.
Katakod digde, nagkaigwa na soboot nin pag-urulay dapit digde an manlaen-laen na sektor alagad kaipuhan na marepaso an bagong panundon na ipapautob.
Mientrastanto, pagsinabing ambulant vendors ini an mga paratienda na dae pa kaya magbayad nin pwesto sa market na kadalasan mahihiling sa mga public areas siring kan mga tinampo, sidewalks kun saen an saindang mga negosyo an maikokonsederar na informal, na nag-ooperar sa paagi kan day-to-day basis.
Sa ngunyan, pigsierto na sana ni Robredo na padagos an saindang pagbilog nin mga programa na makakatabang sa bilog na siyudad nin Naga.
