NAGA CITY- Makakareseber nin incentives an mga atleta na nakapagpuli nin medalya sa Division kan Camarines Sur sa nakalihis na Palarong Pambansa 2025.
Sa entrevista kan Bombo Radyo Naga ki Atty Salvador Bogs Pelingon, Division Information Officer kan DepEd Camarines Sur, sinaysay kaini na nag-courtesy visit naman an mga nanggana sa Palarong Pambansa sa Division Office bitbit an saindang mga napangganahan na medalya.
Sigun ki Pelingon, 2 silver an nakua kan mga atleta gikan sa Camarines Sur para sa reglar sports, 2 bronze para sa paralaympics.
Katakod kaini, igwa soboot na incentives na itatao an Provincial Government para sa mga atleta na naging matrayumpo an saindang paglaban para sa nasambitan ng torneo. Para sa gold medalist makakareseber an mga ini nin P20-K, P15-K sa silver medalist asin P10-K para man sa bronze medalist.
Mientrastanto, pigsaysay man kan opisyal na dakulang tabang an mga nagin eksperyensiya kan nakalihis na Palarong Pambansa nin huli ta magigin panalmingan ini sa mga gigibuhon sa mga masunod na torneo.
Sa ngunyan, nagpa-abot na sana nin pasasalamat an opisyal sa mga nagtarabang tanganing magin matrayumpo an nasambitan ng aktibidad.
