NAGA CITY – Ikinabigla kan sarong opisyal kan Department of Trade and Industry-CamSur an pagbutas sa pwesto ni dating DTI secretary Alfredo Pascual.
Sa entrevista kan Bombo Radyo Naga ki Jay Percival Ablan, Provincial Director kan DTI-CamSur, sinaysay kaini na ikinabigla man ninda an desisyon na idto kan dating sekretaryo alagad pigrerespeto man soboot ninda ini.
Dugang pa ni Ablan, saludo man ini sa mga naginibuhan ni Pascual sa saindang ahensya orog na an mga programa na namukna kaini na nakatabang sa business sector magin sa mga konsumedores sa laog kan saiyang nagin termino.
Nagpaabot man ini nin pasasalamat sa dating sekretaryo para sa gabos na tabang na naiheras kaini sa Bicol Region.
Nagtutubod man si Ablan na sisay man an magribay sa dating opisyal an makakayang malampasan an mga naginibuhan kaini para sa saindang ahensya. Susuportaran man soboot ninda an gabos na mga magigin programa kaini orog na an labing makakatabang sa mga MSMEs asin sa publiko.
Sa ibong na lado, hagad man kan opisyal na an magribay na bagong sekretaryo kan saindang ahensya an laog sa core values kan DTI. Kun sain, dapat ini an igwa nin passion sa trabaho orog na pag-abot sa paglapigot tanganing mas mapakusog an economic development kan nasyon.
Ini orog na ta nakadepende soboot an ekonomiya kan local asin national sa DTI kun kaya kaipuhan na talagang passionate ini sa saiyang piggigibong mga lakdang.
Panduwa, dapat na igwa nin integridad an sarong tawo, huli ta an posisyon na igwa sinda an pinagkatiwala sana kan mga tawo. Dipisilon man na mawara an tiwala kan mga tawo sa sarong opisyal huli ta labi ining makakaapektar sa saiyang performance.
Pantolo an competence, huli ta dae pupwedeng kun sisay sana an magtukaw sa siring na posisyon, huli ta kaipuhan na igwa sinda nin pag-intindi sa sitwasyon asin pagpapadalagan kan ahensya.
Apwera pa digdi, kaipuhan an marhay na koordinasyon kan manlaen-laeng organisasyon tanganing mas magin matrayumpo an lambang programa na ini.
An pinakahuri asin pinaka importante an pagpapadaba sa sadiring nasyon, huli ta magigin posible sana an gabos na ini kun igwa nin pagpapahalaga an sarong tawo sa saiyang bansa.
