NAGA CITY- Maduong pigkondenar kan Department of Justice (DOJ) an nagkukuriyat na malisyosong video dapit ki Presidente Ferdinand Marcos Jr.
Sigun ki DOJ Spokesperson Assistant Secretary Mico Clavano, maninimbag sa ley an isay man na nagpapakuriyat kan salang impormasyon sa irarom kan Article 154 kan Revised Penal Code orog na kun posible malaog sa alanganin an public order asin an estado.
Obheto soboot kan pekeng video na raoton an kredibilidad kan presidente orog na ta nakapukos ini sa nangyaring ikatolong State of the Nation Address kan presidente.
Pig-enkaminar kan Department of Justice an publiko na likayan an pagpapakuriyat kan siring na video na nagkakawsa sana nin karibongan asin pagkakawatak-watak kan mga namamanwaan.
Pigsierto man kan Department of Justice na magibo sinda nin lakdang tanganing maaraman an nasa likod kan mga responsable sa pagpapakuriyat nin malisyosong video.
