Nakapreparar an Metropolitan Manila Development Authority (MMDA) sa piglalaomang tigil-pasado kan mga grupong Piston asin Manibela ngunyan na semana.
Sigun sa MMDA, nakikipag-koordinar na an ahensiya sa Department of Transportation (DOTr), Land Transportation Franchising and Regulatory Board (LTFRB), asin mga lokal na gobyerno sa Metro Manila tanganing masierto na mababawasan an abala sa mga pasahero.
Pigsierto man ninda na matinir na normal an deployment kan saindang mga personahes asin igwang nakapreparar na mga lunadan na pwedeng gamiton kun kakaipuhanon.
Sa iniluwas na anunsyo, masagibo an Piston nin nationwide transport strike sa Huwebes, Setyembre 18, komo protesta kontra sa soboot katiwalian, partikularmente sa mga iregularidad sa flood-control projects kan gobyerno.
Mientrastanto, pig-anunsyar kan grupong Manibela na masagibo sinda nin tolong aldaw na nationwide transport strike puon Setyembre 17, hasta 19 tanganing ipahayag an saindang pagkondenar sa parehong isyu.
