NAGA CITY- Naaagnas na kan madukayan an lawas kan sarong babae sa Nabua, Camarines Sur.
Binisto an babae na si Elizabeth Sarazpi, 50-anyos.
Sa entrevista kan Bombo Radyo Naga ki PO3 Ritche Doctolero, tagapagtaram kan PNP Nabua, sinaysay kaini na naparong kan mga residente sa barangay San Esteban an mabatang parong na hale suboot sa harong ni Sarazpi.
Digdi na nagdesisyon an mga residente na maglaog sa nasambitang harong asin digdi na nahiling an bangkay ni Sarazpi.
Tulos man na pigpaabot sa hepatura kan kapulisan an nasambitang pangyayari.
Huri suboot na nahiling na buhay an biktima kan nakaaging Hulyo 22.
Sigon ki Doctolero, nagluluwas sa saindang imbestigasyon na solo sana sa saiyang harong si Sarazpi asin igwa ining pigmamateng helang.
Sa ngunian, isinairom na sa otopsiya an nasambitang biktima tanganing maaraman an totoong rason kan saiyang pagkagadan.
