NAGA CITY- Nagdeklarar na nin suspension of classes an nagkapirang mga banwaan sa Camarinens Sur, Quezon asin sa bilog na probinsaya nin Laguna
huli sa namamateang raot nin panahon na dara kan Southwest Monsoon na mas pinakusog kan Tropical Depression Hanna.
Enot digdi, nagpaluwas na nin direktiba si Governor Migz Villafuerte sa gabos na alkalde kan mga banwaan kan CamSur na tulos na magsuspendir nin
klase asin magpautob nin pre-emptive evacuation enkaso mas lumala an kamugtakan kan panahon sa kanya-kanyang lugar na nasasakupan.
Apwera digdi, nagpautob na man nin ‘No sailing Policy’ si Villafuerte kun saen nasa 40 mga pasahero naman an na-stranded sa Pasacao Port na anas
mga pasiring sa Masbate.
Segun ki Petty Officer 1st Class Graciano Cañeba, Sub-Station Commander kan PCG-Pasacao, tutugutan sana na maglawod an mga lunadang
pandagat kung mayo nang nakabanderang gale warning asin magbalik na sa normal an kamugtakan kan kadagatan.
Katakod kaini, mas pinahigot suboot ninda an pagmomonitor sa mga coastal areas para masierto na mayong makakalusot sa mga parasira na
mapumirit na maglawod sa ibong kan raot kan panahon.
Mientrastanto, nagkapirang banwaan naman sa Quezon arog kan General Luna asin Tiaong an nagpautob man nin suspension of classes habang sa
interong probinsya kan Laguna man an ipinautob ni Laguna Governor Ramil Hernadez.
