NAGA CITY-Trending sa social media an litrato kan nakabaliktad na Philippine Flag sa sarong barangay hall sa ciudad nin Naga.
Sa entrevista kan Bombo Radyo Naga ki Genaro Martinez, residente kan barangay Igualdad, sinaysay kaini na nanutaran na sana ninda na nakabaliktad na an Philippine flag sa flag pole na kahampang kan saindang Barangay Hall kun saen nasa itaas na an kolor na pula imbes na kolor blue.
Basado sa Sec. 10 kan RA 8491 o an Flag and Heraldic Code of the Philippines, nakapalaog digdi na kun nakabugtak sa flagpole an Philippine flag, dapat na blue an kolor kan itaas kaini kun panahon nin katoninongan mantang pula man kun panahon nin giyera.
Tinawan doon ni Martinez, dapat suboot na irespeto kan gabos an pagbubugtak nin flag huli ta simbolo ini kan nasyon.
Mientrastanto, sa suway na entrevista ki kapitan Antonio Galido kan nasambitang barangay, pigkawatan suboot kan mga aki sa saindang lugar an flag pole kaya nabaliktad an nasambitang flag basado naman sa kua kan CCTV Camera sa lugar.
Katakod kaini, naghagad man nin dispensa an barangay kapitan asin pigsierto na dae na mauutro pa an pangyayari.
