NAGA CITY – Nagtitinir na sa kustodiya kan mga otoridad an duwang persona na nakumpiskaran nin maabot sa P1.3-M na iligal na droga sa Barangay Irayang Sulong, Minalabac, Camarines Sur.
Binisto an mga suspek na sinda Lorraine Santiago-Espelita, 32-anyos asin John Lennon Espeso,24-anyos.
Sa entrevista kan Bombo Radyo Naga ki PCapt. Ryan Bagasala, hepe kan Minalabac-PNP, sinaysay kaini na ginibo ninda an operasyon sa residensya kan suspek na si Espelita kunsaen nakabakal an mga otoridad nin pigtutubudang shabu na nagkakantidad nin P10,000.
Apwera digdi, nakumpiskar man sa suspek an kinakarkulong nasa 200 gramo nin shabu na nasa P1.3-M an kantidad.
Mientrastanto, nagpapadagos pa an imbestigasyon kan mga otoridad mantang napag-araman na gikan sa Maynila an mga nakumpiskang iligal na droga.
