NAGA CITY- Nakatalaan na magdeploy an Naga City Police Office nin nasa 533 na mga personahe para sa ikukundusir na National Youth Day sa Hunyo 10 hasta 14 kan presenteng taon sa siyudad nin Naga.
Sa nagin paghampang sa mga kagawad kan media ni PLTCOL. Chester Pomar, Public Information Office kan Naga City Police Office, sinaysay kaini na preparado sindang magtao nin asistensiya asin mag-asegurar sa kasalbaduhan kan mga mapartisipar sa nasambita ng aktibidad.
Katakod digde, igwang 34 na personahe an ibubugtak para sa Task Force Naga; 15 na mabantay sa convoy kan mga VIPs’; igwang 52 na personahe an ide-deploy sa simbahan asin mga mall; 8 tanganing magmantinir sa seguridad kan mga VIP.
Apwera digde, igwa man na 83 na personahe an ide-deploy para sa mobile bike asin foot patrol; 90 sa traffic management; 60 sa venue; 30 sa sub task group; 72 sa mga bisita; 80 sa motorists assistance center asin iba pa.
Sigun ki Pomar sa pangkabilugan igwa nin nasa 533 na personahe gikan sa saindang hepatura an idedeploy para sa National Youth Day.
Apwera soboot ini sa itatao man kan CSPPO para sa saindang nasasakupan. Mientrastanto, an Incident Command System an mamanehar mapadapit sa mga reklamo dapit sa activities na ini.
Sa ngunyan, pigsierto kan opisyal na dagos-dagos an saindang preparasyon tanganing magin matuninong an pagkundusir kan nasambitan ng aktibidad.
