Pormal nang inako kan Office of the Ombudsman an panibagong ‘joint referral’ gikan sa Department of Public Works and Highways asin Independent Commission for Infrastructure ngunyan na aldaw Nobyembre 26, 2025.
Personal pa ining isinumiter ninda ICI Chairman Andres Reyes asin Public Works Sec. Vince Dizon ki Ombudsman Jesus Crispin ‘Boying’ Remulla.
Kaibahan kan rekomendasyon, kapansin-pansin an maabot sa 20 kahon na igwang laog nin mga dokumento komo ebidensiya.
Sigun ki Ombudsman Jesus Remulla, makalihis an ebalwasyon na mahaloy sana nin pirang oras saindang isasairarom an nasambitan ng rekomendasyon sa ‘fact finding’.
Dakulang tabang soboot ini huli man ta an nagkapira sa mga pigrekomendang makasuhan an sainda ng pig-iimbestigaran.
Sa ipinasang ‘joint referral’ kan komisyon asin ahensiya, saindang pigrerekomendang mapakasuhan sa Ombudsman an walong pigkokonsiderar komo ‘cong-tractors’.
Inilahad mismo ni Public Works Secretary Vince Dizon an mga pangaran kan pigkonsiderar na ‘cong-tractors’ kun saen kaibahan digde an dating representantes kan Ako Bicol Party List Representative na si Zaldy Co.
Basado sa ebidensiyang nakalap siring kan mga kontra asin patotoo na sinda an may kansadiri kan ‘construction company’, manlaen-laen na mga kaso an saindang pigrerekomendang maisunad kan Ombudsman.
Mawot soboot nindang mapakasuhan an mga ini nin graft, plunder, bribery, conflict of interest, asin pagbalgay sa Government Procurement Act.
Huli digde, ipigheras man ni Ombudsman Jesus Crispin Remulla na saindang pighagad na man sa Bureau of Immigration na mapugolan an mga imbwelto na makaluwas nin nasyon.
Nagpadara na soboot ini nin surat tanganing mag-isyu nin Foreign Travel Restriction Order kontra sa 77 indibidwal presenteng pigsasairarom sa fact-finding.
