Pormal nang naresibe kan Philippine Air Force (PAF) an huring pitong S-70i Black Hawk helicopters.
An pitong Black Hawk helicopters parte kan 32-unit acquisition program na binakal kan gobyerno sa PZL Mielec kan Poland.
Sa paagi kaini, an PAF igwa nin total na 47 S-70i Black Hawks, na iyo an Pilipinas na may pinakadakulang armada nin mga helikopter sa Asya.
Ginibo an turn-over asin blessings kan pitong helicopter sa 250th Presidential Airlift Wing Hangar sa Villamor Air Base sa Pasay City kan Miyerkules, Agosto 26.
An PAF Commanding General Lt. General Arthur Cordura an nangengenot sa pag-ako kan mga helicopter.
An 32-unit na pagkua pigkontrata kan 2022 sa irarom kan programa sa modernisasyon kan Armed Forces of the Philippines (AFP).
Sinabi ni Cordura na napunan na an haloy nang kakulangan sa combat utility helicopter capability kan Philippine Air Force.
Kan 2019, an PAF nagpirma nin sarong kontrata para sa 16 na S-70i Black Hawks, na ipinadara poon 2020 sagkod 2021.
An mga ini ginamit para sa humanitarian assistance siring man sa disaster response asin relief operations sa panahon kan destroso kan Bagyong Odette.
Mantang kan 2022, pinalawig ninda an pagbakal asin nagpirma para sa 32 na dagdag na S-70i na mga helikopter, na ipinadara poon 2024 sagkod 2026.
