NAGA CITY– Nagpagirumdom giraray an Provincial Disaster Risk Reduction and Management Office (PDRRMO) sa publiko na mahigot man giraray na pinapangalad an pagsakat sa Mt. Banahaw sa probinsya nin Quezon ngunian na Semana Santa.
Sa entrevista kan Bombo Radyo Naga ki Dr. Henry Buzar, head kan PDRRMO-Quezon, sinaysay kaini na dae pa man giraray pigtutugutan na magsakat an mga deboto asin an mga turista na mabisita sa nasambitan ng bulod.
Sigon ki Buzar, obheto kaining pahingaluan muna an nasambitan ng bulod asin mamantinir an kalinigan sa lugar.
Dagdag pa kaini, hasta sa pamitisan sana kan bulod pwedeng magduman an mga deboto para magpangadyi.
Piglalaoman na mapuon na magbulos an rinibong mga deboto sa aldaw nin Lunes hasta Byernes Santo.
Pigdadayao an nasambitan ng lugar huli sa sarong falls na pigtutubudang nakakapagparahay nin mga kamatean.
Saro sa mga piglilikayan nang mautro kan mga otoridad an nangyari kan taong 2014 kunsaen nasulo an haros 100 ektarya kan bulod huli sa mga deboto na nagamit nin kalayo mantang nasa itaas kan nasambitan ng bulod.
