NAGA CITY- Makundusir nin counselling sa mga kajovenan an pamayuhan kan Barangay San Francisco Naga City ngunyan na aldaw sa pangangenot kan peace and order group.
Ini an isasagibo sa covered court kan saindang barangay.
Sa entrevista kan Bombo Radyo Naga ki Efren Nepomoceno, Barangay Kapitan kan nasambitan ng lugar, sinaysay kaini na kinakaipuhan na maipaabot kan mga jovenes an saindang mga problema tanganing malikayan an depression asin paglala kan sitwasyon na posibleng magresulta sa paghuhugot.
Sigun pa sa opisyal sa presenteng panahon, kaipuhan na magkaigwa nin programa para sa mental health awareness orog na ta nakapagrehistro an saindang lugar nin kaso kan suicide.
Katakod digde, liwat na pig-enkaminar ni Nepomoceno an mga magurang na makipagtabangan sa sainda sa pagtatao nin marhay na giya sa saindang mga kaakian tanganing malikayan na makapag-isip nin mga mararaot.
An pagtutok asin pagmonitor kan mga magurang an makakatabang nin dakula tanganing dae mamatean kan mga jovenes na solo ninda an mga problema na kinakahampang.
Apwera digde, liwat man na pigtawan duon kan opisyal na dae kasimbagan an paghuhugot sa anuman na angat na pasan kan sarong indibidwal nin huli ta an gabos na problema igwa nin kasimbagan.
Sa ngunyan, hagad na sana kaini an kooperasyon kan publiko para sa pagbusol kan mga programa na makakatabang sa mga kajovenan sa saindang lugar.
