NAGA CITY- Madugang nin CCTV camera sa saindang barangay an pamayuhan kan San Jose Pili, Camarines Sur ngunyan na taon.
Sa entrevista kan Bombo Radyo Naga ki Lorradel Alamo, Barangay Kapitan kan nasambitan ng lugar, sinaysay kaini na nag-abot pa sana sa 22 an saindang CCTV camera puon kan pig-install kan nakalihis na Oktubre 2025.
An mga ini makukua sa Zone 1 hasta Zone 6 asin kadaklan yaon sa mga main road. Sigun ki Alamo, dakulang tabang sa saindang barangay enkaso igwang magbungkaras na krimen, harabunan asin iba pang insidente an pagkakaigwa kan nasambitan ng CCTV camera.
Nagseserbe ining dugang na pwersa tanganing mamantinir an paz y orden sa saindang area.
Katakod digde, maogma man na pigheras kan opisyal na igwang pondo o budget na pigtagama digde tanganing marealisar an plano na pagdugang sa nasambitan ng ekipahe.
Mientrastanto, kamawotan pa kan opisyal na mabugtakan nin CCTV an riverside asin gabos na street sa saindang barangay.
Sa ngunyan, hagad na sana ni Alamo an pakikipagtabangan kan saindang mga nasasakupan sa pagmantinir kan katuninongan asin kagayunan kan saindang barangay.
