Pig-apod kan Malacañang na sarong garapal na pangapodan na maggibo nin kudeta an Armed Forces of the Philippines (AFP) laban sa administrasyon ni Marcos asin talikudan an saindang sinumpaan na katungdan, tangani sanang magtukaw sa pinakahalangkaw na pwesto an aking babae na si VP Sara Duterte.
Ini an hayag na pigsaysay ni Executive Secretary Lucas Bersamin kasunod kan pinaluwas na mga tataramon ni dating presidente Duterte na garu nag-iinkaminar sa mga suldados laban sa presenteng nakatukaw na presidente na si Pang. Ferdinand Marcos Jr.
Segun ki Bersamin, dae nang ibang pwedeng apodon sa pangapodan na ini kan dating presidente kundi makasadiring motibo na probaran na patalsikon sa pwesto an presenteng presidente kan nasyon o mag-establisar nin kudeta tangani sanang makatukaw an saiyang aki.
Nanindugan si Bersamin na dapat igalang ni Duterte an konstitusyon bako suwayan ini.
Dugang pa ni Bersamin na dapat magpundo na si Duterte sa pagigin iresponsable.
Bakong marhay suboot na insultuhon an mga suldados na propesyonal an pag-otob kan saindang misyon asin katungdan asin inkaminaron an mga ini na talikudan an konstitusyon tangani sanang magin mapanggana an saindang makasadiring kamawotan.
Pigsierto ni Bersamin na dae mapaltos an administrasyon sa mandato kaini na pamahalaan nin tama an nasyon susog sa konstitusyon asin rule of law.
Pigdepensahan kan administrasyon an legasiya kaini para sa mga Pilipino na susog sa ley. Pigsierto ni Bersamin na mahiro an estado laban sa mga bakong makatanosan asin pagprobar na magbalgar kan ley.
Nanindugan si Bersamin na dae inaako an madahas na pag-agaw nin kapangyarihan tanganing madaling maibugtak komo presidente sa paagi nin mga asasinasyon, kariribokan asin pagrebelde.
Pigsabihan ni Bersamin an mga Duterte na halaton an tamang panahon, sunudon an tamang prosedimiento.
