NAGA CITY- Gadan an sarong paraoma makalihis makuryente sa banwaan nin San Jose Partido Camsur.
Binisto an biktima na si Manuel Olores, 57-anyos residente kan Zone 1, Brgy. Manzana sa nasambitan ng banwaan.
Sigun ki PCpt. Mark N. Spaña, Officer-In-Charge kan San Jose Municipal Police Station, nakaresiber nin report an saindang hepatura manungod sa sarong bangkay na nadukayan sa Brgy. Manzana sa nasambitan ng lugar.
Tulos man ining pigrespondehan kan mga otoridad asin digde na nahiling an mayo ng buhay na lawas kan biktima.
Basado pa sa imbestigasyon kan mga otoridad, nakaputan kan biktima an raot ng wire sa kusina na naging rason kan saiyang kagadanan.
Kapot pa kan kaini an wire kan maabutan kan mga otoridad.
Pigpurbaran pa man kutang darahon sa ospital an nasambitan ng biktima, alagad dae na naka-abot sa ospital.
Mientrastanto, pigkumpirmar kan mga imbestigador na mayong foul play sa nangyaring insidente.
