NAGA CITY – Pig-eksplikar kan pamayuhan kan lokal na gobierno kan Naga kun tanu kinaipuhan na mag-utang kan syudad orog na kan mga nakalihis na taon.
Sa nagin paghampang sa mga kagawad kan media ni Naga City Mayor Nelson Legacion sinaysay kaini na kadakol an pighahagad kan mga tawo na kaipuhan na masimbagan asin maitao kan syudad.
Apwera pa digdi, igwa an Naga nin allowable net debt service ceiling na P300-M alagad an nautang sana kan syudad an mapakol sa P75-M.
An P50-M digdi ginamit sa pagpagibo nin tinampo na nagagamit na ngunyan asin pagbakal nin mga daga na pigpatugdukan kan mga edificio asin pasilidad para sa pagtao nin marhay na serbisyo kan syudad.
Dugang pa ni Legacion na plano kan syudad na mag secure nin P150-M na loan kun sain an P50-M digdi, itatagama para sa GIS project. I-aaccount man digdi an gabos na real properties asin mga negosyo sa syudad.
Kun ma-iimplementar an nasambitan ng proyekto makakaguno ini nin P100-M na paglangkaw sa revenue kan syudad sa paagi kan real property taxes na makokolektar asin business taxes kada taon.
Huli digdi, dapat sana na maisagibo an nasambitan ng proyekto sa Naga huli ta dakulang kantidad kan kikitaon digdi kan syudad an mawawara.
Sigun pa sa alkalde na ngunyan pa sana, dapat naman na magbakal nin mga daga huli ta posibleng magdoble o triple pa an presyo kan mga ini sa mga masurunod na taon.
Pagirumdom man kan opisyal na dae dapat i-demonized an pag-utang, alagad dapat kasabay kaini an pag-uswag man kan sarong lugar sa paagi kan mga programa na saindang ipig-iimplementar.
