Mahigot sa seguridad ngunyan an Philippine National Police (PNP) para sa implementasyon kan ‘zero violence’ sa papaabuton na eleskyon sa Mayo 12.
Ini an pangenot na direktiba ni PNP Chief PGen. Rommel Francisco Marbil sa mga itatalagang pulis para sa eleksyon ngunyan na papaabuton na Lunes.
Soboot, mamamati kan publiko an striktong implementasyon sa mga checkpoints asin chokepoints sa bilog na nasyon.
Ini an katakod pa man sa mas pinahigot na monitoring kan PNP sa implementasyon kan gun ban na padagos pa man nagkakaigwa nin mga naiirehistrong pagbalgar gikan sa manlaen-laeng parte kan nasyon.
Kasunod kaini an pigsuhestyon man kan hepe an importansya kan pagbabantay sa mga pantalan sa nasyon huli sa mga botanteng mapuli pa sa kanya-kanyang mga probinsiya para bumoto.
Soboot, kaipuhan na masierto na mayong magigin disgrasya o maiirehistrong aksidente sa mga transportation hubs tangani masierto an seguridad asin man kaayusan sa publiko orog na sa weekends kun saen pinaglalaoman na an pagpuli kan nagkapira.
Apwera man sa direktiba ni Marbil na pahiguton an seguridad sa mga checkpoints asin magin sa mga pantalan ay nagtao man nin sarong mahigot na pagsusugo an hepe sa mga commanders asin tauhan kan saindang hanay gikan sa manlaen laeng regional offices na dapat mahiling an presensya kan PNP sa mga lansangan.
Soboot, dapat ay magbaba sa mga komunidad an mga command officers asin gamiton an saindang bilog kapasidad tangani mapugulan an mga ano ma na huma kan kariribokan na pwedeng mangyari sa mismong aldaw kan eleksyon.
Kasunod kaini ay nagpatanid man an hepe na kun sisay man gikan sa saindang hanay an nagbalgar sa direktibang ini an nagpabaya sa saindang sinumpang tungkulin an susunadan nin mga nagkakanigong kaso.
Mientrastanto, magpuon ngunyan na aldaw, Mayo 8, mapuon na man an full force deployment kan saindang hanay mantang sa Mayo 9 man an implementasyon kan Kontra Bigay campaign tangani malikayan an mga maiirehistrong vote-buying mantang paparani an midterm elections.
