Liwat na pigsierto asin piglangkawab kan Philippine National Police (PNP) an seguridad pirang aldaw antes an mga ikakasang hiro protesta puon ngunyan na dominggo Nobyembre 16 hasta Nobyembre 18.
Sigun ki Acting PLtGen. Jose Melencio Nartatez Jr., pupuonan an pagtatalaga kan pulisya ngunyan na Nobyembre 15, sarong aldaw antes an mismong mga programa kun saen makundusir man nin full deployment an National Capital Region Police Office (NCRPO) na magtatalaga kan 16,664 na mga personahe sa bilog na Metro Manila.
Pigsierto pa ni Nartatez, na preparado an bilog na kabuhan kan Pambansang Pulisya sa siring kaining mga mahewasang pagtitipon huli ta mas pinahigot asin pinakusog pa an police visibility kan pulisya.
Para man sa three-day protests, piglalaoman na na maantendir an dae mababa sa 300,000 na mga indibidwal para sa pagtiripon sa parte kan Edsa People Power Monument sa pangengenot kan United People’s Initiative (UPI) mantang lampas sa 100,000 man na mga indibidwal kada aldaw an piglalaoman na maatendiir sa Quirino Grandstand para man sa INC Peace Rally.
Para sa mas pinapusog na seguridad asin pinahigot na police presence, nagdeploy an PNP kan mga personahe sa parte kan Quezon City, Manila, Pasay City, asin pira man an naitalaga sa mga pangenot na tinampo kaibahan na an pirang mga edificio kan gibierno.
Mientrastanto, nanindugan man an PNP na mantang padagos na pigrerespeto an derechos para sa libredong pamamahayag mahigot pa man na ipapautob an mga nag-iiral na ley asin mahigot na safety protocols para man sa pagsierto kan kasalbaduhan kan gabos kan mga maatendir.
