NAGA CITY- Naglangkaw an presyo kan lada o sili sa merkado publiko kan siyudad nin Naga.
Sigun ki Gina, sarong paratienda gikan pa sa Sariaya, Quezon an supplier kan nasambitan ng produkto kun saen an saindang puhunan an nag-aabot sa P520 per kilo.
Huli sa langkaw kan presyo kaipuhan soboot nindang mag-adjust kun kaya saro hasta duwang kilo sana an saindang binabakal.
Ini an pigpapatos na igwang laog na lima hasta anom na pidaso kan lada asin pigpapabakal sa kantedad na P20.
Sigun pa ki Gina, piglilikayan soboot ninda na ipabakal nin per kilo an lada huli ta nakikilhag an mga parabakal sa labing mahal kan presyo.
Dugang pa kaini, huli sa halangkaw an puhunan sa lada dae pwedeng magbakal nin kadakol huli ta enkaso maraot labi an saindang kalugihan.
Mientrastanto, kasabay kan paglangkaw kan nasambitan ng produkto padagos man an pakiulay kan mga paratienda sa merkado publiko na intindihon kan mga tawo an presyuhan kan mga barakalon huli ta kaipuhan man soboot nindang mamuhunan.
Sa ngunyan, kamawotan na sana kaini na magmarhay na an presyuhan kan mga produktong pigpapabakal tanganing maibalik an saindang nagin puhunan.
