NAGA CITY- Padagos pang pighahanap kan mga kapulisan an sarong lalaki na suspek sa pambabadil sa saiyang paryentes sa Calabanga, Camarines Sur.
Binisto an suspek na si Russell Tatel.
Sa nagunong impormasyon kan Bombo Radyo Naga, napag araman na nasa laog kan saiyang harong an biktima na si Renato Tatel, 31-anyos kan bigla na sana suboot mag abot an nasambitang suspek asin pinapaluwas ini.
Nahiling suboot kan biktima na igwang darang UZI firearm asin sarong cal. 45 na badil an suspek kaya man napiritan siyang magdalagan pasiring sa outpost kan mga militar sa nasambitang lugar.
Hinabol pa suboot kan suspek an biktima asin pinaputukan alagad swerte man na dai tinamaan nin bala si Renato.
Tulos man na nagdulag si Russel kan mahiling niya an mga miyembro kan Philippine Army na nagluwas sa saindang outpost.
Basado sa imbestigasyon kan mga kapulisan, nagluluwas na haloy ng dai pagkakaintindihan an rason sa likod kan nasambitang pambabadil.
