NAGA CITY- Aminado ngunian an Rappler reporter na si Pia Ranada na nakakaresibe siya nin huma sa buhay magpuon kan pangaladan na maglaog sa Malacañang asin mag-cover nin ano mang presidential activities.
Sa entrevista kan Bombo Radyo Naga ki Ranada, sinaysay kaini na dai na nakakaturog an saiyang ina sa kakaisip huli sa mga nareresibeng huma sa buhay kan aki.
Inako man kan Rappler reporter na nakukulgan siya sa mga negatibong pahayag na nareresibe mula sa netizens urog na kan mga taga suporta kan administrasyon.
Tinawang duon man ni Ranada na dai siya nagreresibe nin bayad gikan sa kisisay man para sana rautan an imahe ni Presidente Rodrigo Duterte asin ginigibo sana niya an saiyang trabaho komo sarong reporter.
Meintrastanto, pigheras man ni Ranada na nag-apela na an Rappler sa Court of Appeals (CA) asin hinahalat na sana an desisyon kaini katakod kan ipinaluwas na kasuguan kan Securities and Exchange Commission (SEC) na pagpapa-kanselar sa lisensya kan nasambitan ng online news agency.
Napag araman na nagbisita kasuodma sa ciudad nin Naga si Ranada makalihis imbitaran sa Forum on the State of the Philippine Media and Press Freedom na pinangenotan kan Caceres Communications Coommission kan Archdiocese of Caceres.
