NAGA CITY– Nasabat kan mga otoridad an sarong truck na gikan sa Metro Manila asin pigtutubudang nagdedeliver nin mga iligal na droga sa manlaen laen na parte kan Bicol Region.
Sa entrevista kan Bombo Radyo Naga ki PC/Supt. Melvin Buenafe, Regional Director kan Police Regional Office (PRO5), sinaysay kaini na sa tabang kan publiko na nagtao sa sainda nin impormasyon dapit sa nasambitan ng kaduda-dudang transaksyon kan sarong delivery truck sa Bicol kung kaya nadakop ninda an suspek na si Salustiano Abasola, Jr. sa syudad nin Naga.
Napag-araman na gikan pa sa Manila an nasambitan ng suspek asin nagdedeliver nin mga marine products sa manlaen laen na parte kan rehiyon kasabay kan mga iligal na droga na nakatago sa tahaw kan nasambitan ng mga produkto.
Narekober ki Abasola an tolong sachet kan pigtutubudang shabu asin mga drug paraphernalia.
Sa ngunian, nagtitinir na sa kustodiya kan mga otoridad an suspek mantang pigpepreparar an kasong isusunad kontra digdi.
