Pabor si Senador Erwin Tulfo sa nagin hakbang ni Presidente Ferdinand R. Marcos Jr., na ibalyo an pondong nagkakantidad nin ₱36 bilyon, na orihinal kudta nang nakatagama para sa flood control projects, pasiring sa Department of Social Welfare and Development (DSWD) para sa masunod na taon.
Obheto kan lakdang na ini na magamit sa ibang paagi an pondo kan gobyerno, partikularmente na sa pagtabang sa mga nangangaipuhan.
Sigun ki Tulfo, mas makakamarhay asin mas makatarungan na mapasiring an nasambitan ng pondo sa mga nagtitios asin nangangaipihan na mga Pilipino.
Mawot ni Presidente Marcos na gamiton kan DSWD an binalyong flood control fund para sa Assistance for Individuals in Crisis Situation (AICS), sarong programa na nagtatao nin tabang pinansiyal sa mga indibidwal na nakakaeksperyensiya nin krisis, asin sa Sustainable Livelihood Program (SLP), sarong programang obhetong tabangan an mga nagtitios na magkaigwa nin sadiring pagkakakitaan.
Nagtutubod si Senador Erwin na kadakol mga mayong hanap-buhay na mga Pilipino an matatawan nin tyansa na magkaigwa nin sadiring kabuhayan sa paagi kan SLP kan DSWD.
Sa ibong man kan mainit na ulayan dapit sa kontrobersiya sa flood control corruption asin sa isinasagibong budget hearing sa Senado, nangangapodan si Senador Erwin sa saiyang mga kapwa lehislador na dae paglingawan asin tawan pansin man an iba pang mga problema na pigkakahampang kan mga Pilipino.
Pighagad kaini na hanapan man nin solusyon an problema sa padagos na paglangkaw kan presyo kan pagkakan, an sakit sa pagpapabulong huli sa halangkaw na kantidad kan bulong asin serbisyong medikal, asin kawaran nin access sa edukasyon asin trabaho kan kadakol na mga Pilipino.
Hurot ni Tulfo, na yaon man an Independent Commission for Infrastructure (ICI), an Department of Justice (DOJ), asin National Bureau of Investigation (NBI) tanganing matukoy asin imbestigaran an iba pang mga imbwelto sa kontrobersia sa flood control projects.
