Kinumpirmar kan Senate Ad Hoc Committee chairperson Sherwin Gatchalian na magkakaigwa nin enot na hearing an komite sa Martes, Marso 24, manungod sa epekto kan krisis na dara kan nagdadakulang tensyon sa Middle East sa nasyon.
Sa sarong interbyu, sinabi ni Gatchalian na rerepasohon kan komite kun supisyente an pondo kan General Appropriations Act 2026 tanganing masimbagan an epekto kan krisis na dara kan tensyon sa pag-ultanan kan Estados Unidos, Israel asin Iran. Sinabi kaini na sa ika-22 na aldaw kan giyera, dapat igwa nang preparadong mga lakdang an gobyerno tanganing matabangan an mga direktang apektado arog kan mga drayber asin mga motorista na tinatamaan kan halangkaw na presyo kan langs.
Idinagdag pa kan senador na posibleng maapektaran an food security huli sa pagsara kan Strait of Hormuz na sarong importanteng ruta sa global trade nin langis, natural gas asin maging fertilizer.
Huli sa kagrabe kan sitwasyon, pig-iskedyul ni Gatchalian an hearing dawa ngani nasa recess an Kongreso sa Semana Santa. Dapat suboot na magsumite an mga ahensya kan gobyerno kan saindang kanya-kanyang contingency plan na pwedeng i-consolidate, kabali na an pagpreparar sa mga worst-case scenarios.
Katakod kaini, ipigproponer kan senador an savings kan gobyerno, kabali na an pagbawas sa work travel, pagbalyo sa online training asin paglimitar kan gastos sa representasyon, na pwede na makatipid an gobyerno nin maabot sa P90 bilyones sa paagi kan lakdang na ini.
Mientrastanto, sa tahaw kan krisis, nangapodan si Gatchalian sa mga oil companies na dae pag-aprobetsaran an sitwasyon. Naglalaom suboot ini na magkakaigwa sinda nin konsensya asin maglikay sa pagtipon asin bakong makatanosan na paglangkaw kan presyo kan langis.
