Ipapadeport sa China an tugang ni ex-Bamban Mayor Alice Guo na si Sheila Guo sa oras na maresolbar na an gabos kan criminal charges kontra sa saiya, sigun sa Bureau of Immigration.
Sa sarong statement, pigsaysay kan BI na si Sheila Guo an sarong Chinese citizen kun saen an pangaran na nakabugtak sa saiyang pasaporte an Zhang Mier.Sa ngunyan, nakadetine si Sheila Guo sa National Bureau of Investigation.
Nahahampang ini kaibahan an negosyanteng si Cassandra Ong sa mga reklamo na obstruction of justice, pagtatago sa sarong pugante asin pagbalgar sa Philippine Passport Act.
Sa deportation case na kinakahampang ni Sheila sa BI, enkaso makumpirmar na ilegal kaining nakua an saiyang PH documents, papabalikon ini sa China huli ta igwa ining kapot na Chinese passport na igwang bisa hasta 2031.
Sa ngunyan, sigun ki Immigration Commissioner Norman Tansingco, suspendido an deportation ni Sheila Guo mantang nakabinbin pa an resolution sa gabos kan saiyang criminal cases asin iba pang paninimbagan sa Pilipinas.
