Pigpatanid kan US Tsunami Warning System ngunyan na aldaw nin Miyerkules (Martes sa Amerika) an peligro kan tsunami makalihis an sarong makusog na linog na magnitude 8.6 na tumama sa Kamchatka Peninsula sa Russia.
Sigun sa US Geological Survey (USGS), an linog an nairehistro sa rarom na 19.3 km o 12 miles asin tumama 125 kilometro sirangan kan Petropavlovsk-Kamchatsky, sarong baybayong syudad sa Far Eastern Russia.
Nilalaoman kan mga eksperto na maaabot kan mga hukok an nagkapirang parte kan baybayon kan Russia asin Japan sa laog nin tulong oras makalihis an linog.
Sa Japan, nagluwas nin tsunami advisory para sa sirangang parte kan Hokkaido hasta sa Wakayama, kun saen posibleng mag abot sa 1 hasta 3 metro an langkaw kan hukol.
Nagbilog na nin task force an gobyerno kan Japan para sa monitoring asin posibleng tulos na aksyon.
Nagpaluwas man nin tsunami watch an mga awtoridad para sa isla kan Hawaii (US), Guam asin mga isla sa Micronesia kaiba man an mga baybayon kan US West Coast (California, Oregon, at Washington), Aleutian Islands asin dakulang parte kan Alaska.
Mantang sa Russia, pigreport an 3 hasta 4 metrong langkaw kan tsunami an nilalaoman sa nagkapirang parte kan Kamchatka.
Sigun man sa Kamchatka Governor na si Vladimir Solodov, ini an pinakamakusog na linog na nairehistro sa rehiyon sa laog nin pirang dekada.
