Piglinaw ni US State Secretary Marco Rubio na dae kaini pamamahalaan an urualdaw na operasyon kan Venezuelan government, sa ibong kan pagtatalaga ni US Pres. Donald Trump nin sarong US official tanganing mamahala sa nasambitan na nasyon.
Sigun ki Rubio, mawot sana kan US na mahigot na ipautob an presenteng ‘oil quarantine’ sa nasambitan na nasyon.
Paliwanag kan sekretaryo, pangengenutan kan US an masusing pagpapautob sa umiiral na oil quarantine kontra sa mga tanker na dati nang napatawan nin sanction antes pa man maarestar si Venezuelan President Nicolas Maduro.
Mawot kan nasambitan na nasyon na gagamiton ini komo ‘leverage’ tanganing ibusol an pirang pagbabago sa mga patakaran o policy change sa Venezuela.
Kung babalikan an naenot na pahayag ni Trump, pigbanggit digde na paramientras pamamahalaan kan US an Venezuela, an nasyon na pigbibistong may pinakahalangkaw na oil reserve sa bilog na nasyon.
Kasunod kan pagkaka-aresto sa Venezuelan president, piganunsiyar na man ni Trump na tutugutan na an mga darakulang kumpaniya kan langis puon US na maglaog sa nasambitan na nasyon tanganing puunan an pagkua sa dakulang reserba kan krudo na yaon duman.
Enot na man pigtalaga kan Supreme Court kan Venezuela si VP Delcy Rodriguez komo acting president kasunod kan pagkaka-aresto ni Maduro.
