Opisyal na pig-endorso ni Vice President Sara Duterte si Senator Imee Marcos para sa saiyang liwat na pagdalagan sa pagka-Senador sa 2025 midterm elections.
Sa pigpaluwas na 31 segundong video kan Senador sa saiyang facebook page, pig-endorso ini kan Bise Presidente asin kapwa nakasulot nin kulay itom komo pagluluksa soboot sa gutom asin krime asin garo nagpatutsada pa soboot paggipit sa dae ka-alyansa.
An pag-endorso kan Bise Presidente ki Sen. Imee an pirang semana makalihis magkalas an Presidential sister gikan sa senatorial state kan administrasyon kan nakalihis na Marso 26 asin bweltada sa pagigin independent candidate.
Alagad, naenot na man na piglinaw ni Sen. Imee na nagtitinir pa man soboot ining independent candidate sa ibong kan pag-iba kaini sa mga nagin kampanya kan Alyansa kan administrasyon kaidto.
Nag-ugat man an paghali kan Senadora sa Senate slate kan administrasyon kan dae banggiton kan saiyang tugang na si Presidente Ferdinand Marcos Jr. an saiyang pangaran sa pagkampanya ninda sa Cavite kan nakalihis na Marso 21, huli ta naanggot soboot an Presidente sa saiya makalihis pangenotan an imbestigasyon kan Senado sa soboot ilegal na pag-arestar kan International Criminal Court (ICC) ki dating Presidente Rodrigo Duterte.
