Posibleng pig-inutan na ni Vice President Sara Duterte an mga impeachment complaint kontra sa saiya sa paagi kan amay na pag-anunsiyo kan saiyang pagdalagan sa 2028 presidential elections.
Ini an pananaw ni dating Budget secretary Butch Abad, na nagsabing pwedeng estratehiya an timing kan deklarasyon tanganing maimpluwensiyahan an pananaw kan publiko antes pa man mag-usad an mga pagdangog sa Kamara.
Sigun ki Abad, pwedeng nahilingan kan kampo kan bise presidente na magabat an laog kan mga reklamong pigsunad kaya kinakaipuhang maagap ining simbagan sa ladangan kan public perception.
Dugang pa kaini, pwedeng gamiton ni Duterte an saiyang presidential bid tanganing maipinta an mga reklamo komo politically motivated o “harassment” kan mga kalaban, orog na ta padagos soboot ining nangengenot sa nagkapirang pag-aadal.
Sa presente, apat na impeachment complaint na an pigkakahampang ni Duterte sa House of Representatives of the Philippines, an enot na tolo an pigsunad kan mga miyembro kan minority bloc, mantang an ikaapat, an sinuportaran kan nagkapirang lehislador gikan sa majority.
