Kinumpirmar ni US President Donald Trump na nasa 19% tariff an saindang ipinataw sa Pilipinas kun saen sarong porsiyento sana an binawasan sa orihinal na 20%.
Ini an makalihis mag meeting sinda Trump asin Presidente Ferdinand Marcos Jr. Sa sarong social post ni Trump saiyang inihayag na an Pilipinas, magkakaigwa nin open market sa United States with zero tariffs.
Siringpaman nilinaw ni Presidente Ferdinand Marcos Jr na an zero tariff rate an ipapataw sa nagkapirang mga produkto siring sa automobile.
Sinaysay kan Presidente na kahagadan kan US na bukasan an nagkapirang merkado siring na sana kan merkado sa mga lunadang gibo sa Amerika.
Napagaraman na nasa 30 percent tariff an ipinapataw kan Pilipinas sa mga 10 seater na lunadan asin man 20 percent tariff sa mga bus asin trucks.
An 19 percent tariff na ipinataw sa Pilipinas an panduwa sa pinakahababa sa Southeast Asia sunod ini sa 10 percent tariff na ipinataw sa SIngapore.
Nagtutubod man si Presidente Marcos na bagaman sarong porsiyento sana an binawasan kan US sa taripa, maikokonsiderar ini na significant achievement.
Hurot kan Punong Ehekutibo na binaba kan US an taripa, ini an huli ta igwang special relationship an Pilipinas asin US.
Apwera sa zero tariffs sa mga automobile products, nagtugot an Pilipinas na magbakal nin mas kadakol na produkto sa United States.
Sigun sa Presidente malangkaw an importation kan Pilipinas gikan sa Amerika partikularmente sa mga soy products, wheat products asin man mga bulong. Iniladawan man ni Trump si PBBM komo sarong tough negotiator.
Sa meeting kan duwang Presidente liwat nindang pinagtibay an marahay na relasyon kan duwang nasyon asin pig asegurar na ipagpadagos an urulay sa sa ipinataw na taripa kan Amerika sa Pilipinas.
