Liwat na malayag an Atin Ito Coalition pasiring sa West Philippine Sea para sa ikatulong civilian mission kaini sa papaabuton na summer o Mayo 25 tangani ibusol a pagkasararo asin soberaniya kan nasyon.
Kun saen makakaibahan kan koalisyon sa nasambitan ng misyon an nasa 100 civilian volunteers kabali an mga parasisira, artists asin advocates gikan sa Pilipinas asin mga nasyon sa ASEAN.
Plano man na imbitaran an mga parasisira gikan sa ibang nasyon na apektado kan mga panghaharass kan China.
Ipiglatag ni Akbayan Partylist President asin Atin Ito Coalition Co-Convenor Rafaela David an tulong obheto kan isasagibong civilian mission sa WPS.
Enot an pagbusol nin katrangkiluhan asin pagkasararo, suportaran an mga lokal na komunidad asin gikan sa ibang claimant countries asin man pag inkaminar sa pagkakabit-bisig kan mga nasyon na apektado kan agresyon kan China.
Nagkapira sa mga aktibidad na isasagibo sa nasambitan ng misyon iyo an primerong “Peace and solidarity Concert” sa mismong exclusive economic zone kan Pilipinas sa WPS kun saen itatampok an mayamang kultura kan nasyon.
Mientrastanto, padagos man an pagkalap nin koalisyon kan mga donasyon na iheheras sa mga frontliners asin parasisira na apektado kan mga agresyon kan China.
Idinaing man ni Ka Nards Cuaresma, an presidente kan New Masinloc Fisherman Association na kaidto haros dae ninda mamamatean an pag-aksiyon kan gobyerno sa panghaharass kan China sa mga parasisira sa WPS.
Alagad nabuhayan an saindang mga sadiri asin nakanuod na depensaran an saindang mga karapatan komo mga parasisira kan inilunsar an mga naenot na civilian mission kan Atin Ito coalition sa WPS.
An panibagong civilian mission an kasunod kan duwang matrayumpong misyon na isinagibo kan nakalihis na 2023 asin 2024 sa WPS kun saen nagheras nin tabang sa mga parasisira na Pilipino sa nasambitan ng kadagatan kasabay kan pagpapalangkaw nin kamalayan kan publiko sa isyu sa WPS.
