Nagpadara na an Embahada kan Pilipinas sa Myanmar nin team tangani magtabang sa paghahanap sa 4 na Pilipinong nairehistrong nawawara sa siyudad kan Mandalay na harani sa episentro kan nagtamang magnitude 7.7 na linog.
Sigun ki Angelito Nayan, chargè d’affaires kan Embahada kan Pilipinas sa Myanmar, an nasambitan ng team pigbibilog nin 5 miyembror kaiba an vice consul asin man defense attache.
Bumiyahe by land an grupo asin pig laoman na mahaloy nin nasa 15 oras an saindang biyahe antes maabot an lugar. Bitbit man kan grupo an mga suplay na iheheras sa mga Pilipinong apektado kan linog sa Mandalay.
Pigtawan duon man kan PH Embassy official an importansya kan pagsasagibo nin ground assessments asin an pagsuri sa kapakanan kan Filipino community sa mga tinamaan kan linog.
Sigun ki Nayan, igwa nin labi sa 170 na Pilipinong paratukdo an yaon sa Mandalay asin pira sa sainda an posibleng dae nakabalik kan saindang mga harong kan magtama an makusog na linog.
Mientrastanto, pigheras man kaini na naaraman ninda na nawawara an 4 na Pilipino sa paagi kan area coordinators na pawang mga paratukdo na nakabase sa Mandalay.
Alagad nilinaw kan opisyal na dae ninda makumpirmar pa sa ngunyan an pagkakabistuhan o mga pangaran kan 4 na Pilipinong unaccounted.
Dae man soboot maaapod an mga ini na missing o casualties nin huli ta mayo pang impormasyong pagheheras sa ngunyan. Sa katunayan, mayo pa soboot iniluluwas an Myanmar rescue team na ano man pangaran kan mga biktima sa peligrusong linog.
Sa ngunyan, nakumpirmar na nasa salbadong kamugtakan an 123 gikan sa 171 na rehistradong Pilipino sa Mandalay, 32 an isasairarom pa sa verification, 12 ay presenteng mayo sa Myanmar mantang an 4 ay nagtitinir unaccounted.
