Pinatanidan kan Department of Health (DOH) an mga deboto ngunyan na Holy Week na dae kaipuhan a kulugan an sadiri sa pagpepenitensiya siring na sana kan pagpapapako sa krus asin pagrapado sa likudan o self-flagellation.
Sa sarong entrevista, sinaysay ni Health spokesperson Assistant Secretary Albert Domingo na dae kaipuhan kulugan o lugadan an mga lawas alinsunod na man sa abiso kan mga kapadian.
Enkaso man soboot dae malilikayan, pinagirumduman kan opisyal an mga deboto na maggamit na sana nin mga bagay na na-sanitize o paggamit kan antiseptic siring kan iodine tangani malikayan na maimpeksiyon asin man hugasang marahay an mga lugad gamit an sabon asin malinig na tubig.
Saysay pa kan opisyal na an mga lugad sa lawas kan penitensiya an pig aapod na “dirty wound”.
Pwede kaya soboot na paggikanan kan mikrobiyo an alpog sa daga, asin an ginagamit sa pagpenitensiya. Abiso pa kan DOH official na dae na mag lukso pa sa mga sapa o sa dagat asin man linigon tulos an mga lugad.
Ginibo kan ahensiya an pagirumdom kasabay kan taunang tradisyon kan kadakol na mga debotong Katoliko na pagpepenitensiya kada Mahal na Araw tangani man ipahayag an pagbabasol sa mga kasalanan asin girumdumon an dakilang sakripisyo kan Panginoong Hesu Kristo sa paagi kan pagpapapako sa krus asin pagrapado sa likudan kan lawas na isinasagibo kada Huwebes Santo asin Biyernes Santo.
