Duwang aldaw antes man an halalan, todo bantay an Philippine National Police (PNP) laban sa barakalan nin boto sa bilog na nasyon.
Sigun ki PNP Chief PGen Rommel Francisco Marbil, inatasan kaini an gabos nin regional directors asin man field commanders na pahiguton an kampanya kontra vote buying.
Ini man komo kasimbagan man sa pangapudan ni Presidente Ferdinand Marcos Jr., asin man sa direktiba kan Commission on Elections (Comelec) para sa malinig asin tapat na halalan.
Sinaysay ni Marbil na pinapautob ngunyan kan PNP an mas agresibong operasyon, orog na ta igwa nin mga report na nin barakalan nin boto sa pirang mga probinsya.
Patanid kan Pambansang Pulisya na mapapadusahan sa irarom kan ley an sisay man na mapapatunayang imbwelto sa vote buying asin vote selling.
Pinag inkaminar man kaini an publiko na tulos man na i-report an mga siring na insidente sa mga hipatura kan pulis o sa mga hotline kan COMELEC.
Mientrastanto, mapadagos an nasambitan ng “Kontra Bigay” operations hasta sa mismong aldaw nin halalan sa Mayo 12, 2025.
