Nagtugot an International Criminal Court (ICC) Pre-Trial Chamber 1 na palawigon pa an deadline sa pagsusumiter nin mga dokumento may koneksyon sa mga testigo sa kaso ni dating Presidente Rodrigo Duterte.
Sa 5 dahon nin desisyon na may petsang Mayo 20 na tinintaan ni Presiding Judge Iulia Antoanella Motoc, ipinagsugo kan kapulungan sa prosekusyon na kumpletuhon an disclosure kan arrest warrant materials may koneksyon sa mga testigo nin dae malagpas sa Hulyo 1 alinsunod sa request kan Prosekusyon.
Sa Hunyo 16, an deadline kan prosecution para magsumiter kan ano man na mga aplikasyon para sa redaction kan mga pagkakabistuhan kan mga testigo o non-disclosure kan bilog na items kan ebidensiya asin man deadline para sa Victims and Witness Units tangani magsumiter kan saindang mga obserbasyon sa nasambitan ng mga aplikasyon.
Sa Hunyo 20, an pigtalaan na deadline para sa pagsusumiter nin ano man na kasimbagan na may konkesyon sa mga nabanggit na submissions.
Sa Hulyo 1, an deadline kan prosekusyon tangani makumpleto an disclosure kan Arrest Warrant Materials may koneksyon sa mga testigong nabanggit sa saindang request.
Marurumduman kan nakalihis na Mayo 9, nagpadara an prosekusyon nin bagong mga dokumento may konkeksyon sa arrest warrant alagad naghagad man ini nin panibagong deadline tangani i-disclose an natatadang mga materyal.
Sigun sa Pres-Trial Chamber, dae man ini tinutulan kan defense team kan dating Presidente.
