Mahigot na pigsugo ni Presidente Ferdinand Marcos Jr. sa mga kaukulang ahensya kan gobyerno na siertohon an kasalbadohan kan Pilipinong nasa Israel asin Iran.
Sigun ki Palace Press Officer Claire Castro, nasa Amman Jordan na an team na masabat sa mga Pinoy na gikan Israel na mawot magpuli sa Pilipinas.
Kaiba man sa pigtatawan tabang kan presidente an pagtatao nin temporary shelter, pagkakan, asin tabang pinansiyal sa mga pig-ebakwar na Pinoy alagad habo pang maghali sa nasambitan ng nasyon.
Sa mga mawot man na magbweltada sa nasyon, igwa nin nakapreparar na P150,000 na tabang pinansiyal, transportasyon asin accommodation support, medical assistance asin livelihood assistance para sa sainda.
Katakod kaini, pig-enkaminar kan Palasyo an mga Pilipino sa Iran asin Israel na makipag-koordinar sa embahada asin konsulada kan Pilipinas tanganing maipaaram an saindang kamogtakan asin maaraman kun anong tabang an pwedeng maipaabot kan gobyerno.
