NAGA CITY- Pig-orgulyo kan Office of Civil Defense Bicol an pagkaka-estbalisar kan Bicol Regional Federation of Local Disaster Risk Reduction and Management Officers Association.
Obheto soboot kan asosasyon na ini an makapagheras nin marhay na mga lakdang sa pagmanehar kan mga kalamidad sa Rehiyong Bikol.
Sigun ki OCD-5 assistant regional director Jessar Adornado, an pederasyon na ini an makakapamarhay sa pagigin epektibo kan asistensiya, paglalapigot, pagpromoter nin protocols asin pagsierto kan amay asin koordinadong pagresponde sa mga probinsiya sa panahon kan kalamidad.
Dugang pa kan opisyal na an OCD, kaibahan an iba pang national government agencies an maserbe nin advisory board kan federation.
An gabos soboot na aksuyon ninda an susog sa memorandum na pigpaluwas kan OCD asin iba pang ley na igwang kinaaraman sa disaster risk reduction and management.
Marurumduman, an Bicol Bicol Region an bulnerable sa mga bagyo, volcanic eruptions, asin baha.
Katakod kaini, an OCD-5 tatawan an DRRMOs nin tukawan o posisyo sa Regional Disaster Risk Reduction Council.
Sa paagi kaini, magkakaigwa sinda nin boses asin maipapabot an mga agrangay siringman makapagtao nin platform para sa saindang mga programa asin proyekto na masierto man sa kasalbaduhan kan DRRM responders na pigtatao an saindang buhay sa pagbilog kan pusog na komunidad.
Sa pigkundusir na convention puon June 18 hasta 22, an nasambitan ng grupo pigratipikahan an constitution and bylaws asin nag-elihir nin bagong opisyales na mamamayo man sa asosasyon sa laog kan duwang taon.
