Inihayag kan Department of Health (DOH) na padagos na naglalangkaw an numero kan kaso nin dengue sa nasyon, na ngunyan, pogkokonsiderar nang seryosong huma sa salud kan publiko.
Magpuon bulan nin Enero hasta Hunyo 2025, nagpakol na sa 23,000 an kaso nin dengue — mas halangkaw nin 59% kumparar sa kaparehong panahon kan nakalihis na taon. Sa numero na ini, 470 na an nairehistrong binawian nin buhay.
Pinakahalangkaw an numero nin kaso sa CALABARZON, na may 19,500 kaso asin 62 an nagadan. Sigun ki Health Secretary Teodoro Herbosa, dae mapupugulan an paglangkaw nin kaso kan dengue hasta sa dae naa-address an mga lugar kun saen nagsusugok an mga lamok.
Katakod kaini, pinag-aadalan kan DOH an paggamit nin Wolbachia method, sarong makabagong paagi gikan sa Jakarta, Indonesia, na naggagamit nin bacteria tangani pugulan an pagdakol nin mga lamok na may dengue.
Apwera digde, isinasaalang-alang na man an paggamit nin QDenga -dengue vaccine na ginagamit na sa labi sa 40 nasyon. Alagad nilinaw kan DOH na ini an para muna sa mga ospital asin bako man para sa mahewasang pagbabakuna.
Sigun ki DOH Secretary Herbosa, kaipuhan pang magsumiter an pharmaceutical company nin risk management plan, orog na ta pighali na an bakuna sa nagkapirng merkado siring na sana kan Estados Unidos. Suportado man kan Philippine Medical Association an paggamit nin QDenga.
Sigun ki PMA President Dr. Hector Santos, mas salbado ini kumparar sa Dengvaxia nin huli ta an QDenga an basado sa mga aktwal na kaso nin dengue, asin bakong gikan sa yellow fever strain.
