NAGA CITY – Target kan lokal na gobierno kan Naga na mapakarhay an Jesse M. Robredo Coliseum komo mas salbado asin marhay na evacuation site sa oras nin kalamidad.
Sigun ki Naga City Mayor Leni Robredo, maaraman sa Nobyembre an kantidad kan pondo na itinagama kan gobyerno nasyonal para sa enot na phase kan rehabilitasyon.
Base sa bagong disenyo, magkakaigwa ini nin cistern tank na maserbing storage facility kan tubig sa panahon nin tag-uran tanganing makatabang kontra sa pagbaha.
Apwera sa pagiging evacuation site, obheto man kan nasambitan ng proyekto na gibohon na preparado an pasilidad na mag-host nin mga mayor na sports events.
Nin huli sa dakulang kantidad kan pondo na kinakaipuhan, pinag-iisipan man kan lokal na gobyerno na ibali an proyekto sa sarong Public-Private Partnership (PPP) enkaso dae makatao nin supisyenteng pondo an national government.
