NAGA CITY- Pigheras kan Girl Scouts Camarines Sur an saindang nakalinyadang aktibidad ngunyan na Hulyo asin sa mga masunod na bulan.
Sa entrevista kan Bombo Radyo Naga ki Marybel Dolor Binalla, Council Executive kan Girl Scouts Camarines Sur, sinaysay kaini na sa papaabuton na July 12 magkakaigwa soboot sinda nin orientation kaibahan an mga grupo asin indibidwal an imbwelto sa pagpaplano kan manlaen-laen na aktibidad na ikukudusir kan council.
Apwera digde, sa July 25 asin 26 magkakaigwa ma nin overnight camp sa Panicuason kun saen papartisiparan ini kan nasa Grade 4, 5, 6 asin mga senior studen siringman troop leaders asin barangay girls scout.
Sigun ki Binalla igwa pa soboot sindang aktibidad na isasagibo sa Agosto hasta sa mga masunod na bulan na siertong makakatabang sa dugang na kaaraman sa mga partisipantes.
Marurumduman, obheto kan pagkriar kan Girl Scouts saen man na parte kan nasyon an pagpapakusog asin pagpapahiling sa kakayanan kan mga kababaihan mapa joven man o mga adults siringman marealisar an saindang potensyal na makakatabang sa komunidad.
Sa paagi kan mga programa kaini, napapauswag an personalidad kan sarong tawo partikular mga kababaihan tanganing magin aktibong miyembro kan nasyon.
Sa ngunyan, hagad na sana ni Binalla an kooperasyon kan gabos para sa ikakatrayumpo kan saindang mga aktibidad.
